محمد بن اسحاق رحمہ اللہ اسلامی لٹریچر میں اولین سیرت نگار ہونے کے لحاظ سے ایک ممتاز شخصیت کے مالک ہیں- لیکن ان کی ثقاہت کے بارے میں محدثین کے ہاں جتنا اختلاف پایا جاتا ہے` اتنا اختلاف شاید ہی کسی اور کے بارے میں پایا جاتا ہو- ان کا سلسلہ نسب یوں ہے : ابو عبد اللہ محمد بن اسحاق المدنی القرشی مولٰی قیس بن معرمہ بن المطلب بن عبد مناف- ان کے جد امجد کا نام `یسار` ہے جو ``عین التمر`` کے قیدیوں میں سے تھے جسے حضرت ابوبکر صدیق رضی اللہ عنہ کے زمانہ خلافت میں ١٢ ہجری میں مسلمانوں نے حضرت خالد بن ولید رضی اللہ عنہ کی زیر قیادت فتح کیا-